No CEIP Ponte dos Brozos seguimos a valorar a importancia de que o noso alumnado saiba enfrontarse á resolución dos problemas de xeito construtivo. Por iso un curso máis volvemos a poñer en marcha o xa coñecido Equipo de Mediación. Este ano formado por Breogán, Claudia Méndez, Jorge e Claudia Collazo, todos de 6º de E.P.
Durante o primeiro trimestre tivo lugar a formación deste alumnado voluntario e nestes momentos estamos no proceso de difusión para que toda a rapazada do cole teña claro en que consiste a mediación e como facer uso dela.
A resolución de conflitos coa axuda dunha terceira persoa, o mediador ou mediadora, é un proceso voluntario e non competitivo que pretende desenvolver, tanto nos mediadores coma no alumnado obxecto de mediación, habilidades comunicativas e sociais e unha maior empatía.
A medio e longo prazo a mediación persegue mellorar o clima escolar, ter novas estratexias para resolver os problemas de xeito pacífico, diminuír a conflitividade e facer máis responsable ao alumnado conseguindo unha maior implicación deste na vida do centro.
No hay comentarios:
Publicar un comentario